Leka lagu: Ibuk Panjai Mulut

Badu meh badu bala kita ibuk betenah
umbas meh umbas badu bejaku
ngetu meh ngetu anang sebubu ngapa
ka bejaku..pendiau pengidup urang dara

Enda tau meda urang senang mimit2 alu dikejaku.
lalu nyadi buah mulut sida duduk di ruai.
nusi cherita enda betul, kin kia ibuk nyadung petenah
bejaku sengapa tempa

uji ibuk nadai pengawa duduk diau aja meh ibuk
enda ibuh ngiruh diri enggau hal urang
enggai ke mai penusah ngagai diri empu
laban umur ibuk nyau majak tuai
enda manding enti terus panjai mulut bakanya

Enda ke nuan ibuk sedar diri
bakani ulah ibuk  maya agi dara
kada ke nuan enda lebih agi
ari kami ke dara maya diatuk

Nadai salah enti nuan ibuk ka ngajar
tang anang ngajar enggau jaku sindir
ajar manah2 awak ke kami enda pedis ati
ninga ajar ibuk ke Panjai Mulut...

Leka Lagu : Batang Enda Telanggarka Tuga

sulu..nama berita nuan dini alai nuan diatu

lama udah tua nadai kala betemu

pengudah tua diserara apai enggau indai

sida enda Nyagi tua jadi ketegal milih menantu

sida nyerara tua.ukai ketegal tua mali

ukai mega ketegal dendam lama

tang ketegal laban tua ti enda setipak 

jauh bebeda pengidup tua ambai

baka rutan enda dibelah dua

Enti nitih ke pengeran enggau penyayau ati

Nuan asi sigi enda aku lengka sigi enda aku buai

tang  nama daya aku suba sulu

aku sempama baka batang enda Telanggarka tuga 

enda ulih mantah jaku urang tuai

Ngujungka pengerindu tua putus pea aja.

Ti nyema nuan bisi ninga sebana aku tu ambu

undang meh aku kitu dulu

datai meh nuan kitu ngambi aku baru

nguji sekali agi minta aku ba apai indai

Nyangka pintu ati sida tau tebuka meda nuan diatu

Leka lagu : Begulai belaya Beserara Merinsa

Aku arap nuan sulu..bisi ninga lagu aku tu
lagu tu dikena aku nyerita ke pengerindu tua
Maya begulai belaya..tang merinsa..Enti beserara..
tua selalu belaya. laban tua ti enda selali  enda seati..

Maya bepangan..sigi mayuh utai ti ngasuh belaya
ketegal ti saru runding, ketegal ati ti cemburu buta
bisi mega ketegal nuan selalu bula ke aku
besengki  jaku besindir ke ulah pangan diri
nya sigi adat dalam pengerindu..

lebuh ati nyida..bisi maya ka ningal ke nuan
tang nadai kempang..laban penyayau ku ke nuan bujang
bisi sekali maya tua belaya..aku jauh ngejang ningal ke nuan
enda berapa lama udahnya..aku datai baru
nyambung pengerindu tua sulu

Maya jauh ari nuan..ati asai bangat merinsa
merampau lelengau, semampai ingat,bemua ke nuan belama
enda ulih aku jauh nuan asi..ambai ti ku sayau
aku minta sulu,badu agi meh tua begulai belaya bakatu
ibun manah pengerindu tua, awak ke tua ulih idup sekunsi
enda ulih beserara ngapa taja tegal laya..

ku sayau ke nuan sulu..anang Ngeluya Pengerindu Tua..

leka lagu: Butang Ngeladang(Lelaki tauka indu kampar butang enggau laki tauka bini orang ti alai iya diau.)

Nadai aku nyangka...nuan ku ambu kaban
sanggup nikau kaban diri  ari belakang
udah manah aku mai nuan baridup
begulai sejalai..sama begulai enggau aku
nadai aku nyangka nuan..sanggup ngaga pengawa bakanya
udah abis budi ku beri..tang bakatuk..
dibalas nuan..ngagai aku..

nuan ti dikarap ke aku..nemunya makai aku
dibelakang aku, Nuan nangam pengerindu enggau laki kaban diri empu
seduai nya meh disempama ke jaku tuai
butang ngeladang...


sedar ke enda sedar..ari ni pun penatai nuan
enti aku  enda sinu ke nuan suba..nama meh penyadi pengidup nuan diatu
laban nuan urang ke nadai penatai..
enda nemu ari ni tunga pendiau pengidup nuan

ka pan enda kaban..nuan ku buru pulai diatu
ari ruang bilik kami tu..ketegal aku udah cukup malu
digaga dikemeli ke nuan bakatu..
ati ku dah cukup pedis..nerima semua tuk
nadai pegasih agi..nadai penyiru agi ..
aku meda mua nuan..nyau makin begedi..

Leka lagu : cincin pengikat

pengeran..penyayau..nuan sulu, nadai ulih dikira agi

enda ulih disema enggau leka jaku, enda ulih disakal enggau penemu

aku nemu, nuan amat keran ke aku

nuan enda ngira jaku tagang bala urang

nuan enda ngira jaku urang ke bejaie

tang siti aja dikira nuan ambai ati, ngira penyayau enggau pengeran nuan ke aku aja

Taja nuan ukai urang pemisi,ukai urang bereta

tang pengerindu nuan tuchi

semina dibagi ngagai aku aja..

Diatu nuan sulu..udah ngikat aku enggau cincin pengikat

nya meh ketanda, aku ungkup nuan siko

nuan pan ungkup aku aja..

begulai meh tua ambai..nadai ngira jaku urang agi

laban semua urang udah nemu

tua udah idup sekunsi, jadi melaki bini

enda lebu bepangan lama..

padah ke sida semua sulu, tesau gai siti dunya ambai

pemerinsa nya enda nyerara tua ti deka begulai

enti ati udah sama keran, semua pekara nadai nyadi ke penangur..

Leka lagu: Anang idup Nyadi ampa

kitai mensia idup di dunya

enggau mayuh macam ulah mensia

bisi ke jai

bisi ke manah

tang anang meh kitai

milih jalai pengidup ti salah

enggai salah jalai 

tusah ka nikal pulai

Anang meh kitai ngerusak diri

anang enda belalau ke ajar urang tuai

munyi ko jaku sema

mulut urang tuai nya masin

laban dulu makai garam

taja bakani kitai merinsa

ulah diri anang enda nyaga

awak ke selalu dikenang urang manah

enda empa jaku jai urang belama

laban mulut mensia nadai insuran

enda ulih ditutup kitai

ngelua ke jaku jai nadai bekira

nya alai

gaga meh naka ni pemanah

kitai idup ba dunya

anang meh idup nyadi ampa

Dinga ke pesan aku wai kaban

jaku lalau ari aku

anang pedis ati

ukai nyindir bala kitai

tang semina ka belalau ngena leka lagu tu

Leka Lagu:sama bebasa

ku sulu..
amai keran ke nuan
nuan pan sama..baka aku
tang nama daya ..
tua udah sama bisi urang ngempu
aku ungkup iya...
nuan pan ungkup sulu ati nuan
nadai guna ambai
enda ibuh aja tua beambai
enda ibuh aja Tua begulai
aku enggai ngacau pengerindu nuan enggau iya

Laban aku kala ngasai
bakani asai ati  enti dikeduan
naka tu aja meh sulu
bekaban aja tua, enda ibuh lebih ari nya..

Terima kasih wai pangan
Laban nuan bebasa ke peminta aku
Nadai pengirau agi ati aku diatu
Laban tua enda nyadi bepangan
taja pengerindu enda Nyadi
tang aku gaga
laban tua sama bebasa ke pangan diri

Nuan ungkup iya
aku enggai Ngacau agi
aku enggai salah meri ati agi
naka tua aja cherita tua wai pangan
jaga manah bungai nuan ambai...